Breyttar reglur um sóttkví

Fréttir 08.01.2022

Sett hefur verið ný reglugerð um sóttkví og hefur hún þegar tekið gildi. Hér að neðan er farið yfir helstu breytingar og neðst eru hlekkir á reglugerðina og leiðbeiningar sóttvarnarlæknis. Mikilvægt að kynna sér þessar breytingar vel, enda reynir nú meira og meira á okkur öll. Allt miðar að tveim markmiðum sem kannski er ekki einfallt að ná samhliða, að vinna gegn útbreiðslu veirunnar en á sama tíma halda þjóðfélaginu gangandi eftir því sem mögulegt er. Þar er t.d. skólastarf í forgangi.

Breyttar reglur um sóttkví gilda um:

a) einstaklinga sem eru þríbólusettir og fengu síðustu sprautuna meira en 14 dögum áður en viðkomandi er útsettur fyrir smiti

b) einstaklinga sem hafa jafnað sig af staðfestu Covid-smiti og eru jafnframt tvíbólusettir, að því gefnu að þeir hafi fengið síðari sprautuna meira en 14 dögum áður en þeir voru útsettir.

Breyttar reglur fela í sér að hlutaðeigandi er:

heimilt að sækja vinnu eða skóla og sækja sér nauðsynlega þjónustu, s.s. heilbrigðisþjónustu, fara í matvöruverslanir og lyfjabúðir og nota almenningssamgöngur,
óheimilt að fara á mannamót eða staði þar sem fleiri en 20 koma saman, nema í því samhengi sem nefnt er hér að ofan,
skylt að nota grímu í umgengni við alla nema þá sem teljast í nánum tengslum og gildir grímuskyldan einnig þótt hægt sé að halda tveggja metra fjarlægð,
óheimilt að heimsækja heilbrigðisstofnanir, þar með talin hjúkrunarheimili, nema með sérstöku leyfi viðkomandi stofnunar,
skylt að forðast umgengni við einstaklinga sem eru í aukinni hættu á alvarlegum veikindum ef þeir smitast af Covid-19.

Takmörkunum samkvæmt ofangreindum reglum lýkur ekki fyrr en með niðurstöðu PCR-prófs sem tekið er á fimmta degi sóttkvíar. Ef einstaklingur finnur fyrir einkennum smits einhvern tíma á þessu fimm daga tímabili á hann að undirgangast PCR-próf án tafar. Tími í sóttkví er aldrei skemmri en fimm dagar.

Reglugerðin var birt í Stjórnartíðindum síðdegis í dag ( 7. janúar 2022) og hefur þegar öðlast gildi og gildir um alla einstaklinga sem sæta sóttkví við gildistöku hennar.

Til baka