Eftir áramót hófu 12 slökkviliðsmenn í slökkviliði Grýtubakkahrepps fjarnám í slökkvistarfi í Háskóla Íslands á vegum Brunamálaskólans. Fjarnámið fór fram í tölvuveri Grenivíkurskóla. Allur hópurinn var saman í náminu svo og í prófinu að undanskyldum einum sem tók prófið út á sjó. Guðni Sigþórsson slökkviliðsstjóri telur þetta mjög gagnlegt að geta boðið upp á slíkt nám í fjarkennslu. Í framhaldi verður  verklegt próf í haust og útskrifast hópurinn sem fullgildir slökkviliðsmenn á haust dögum. Til gaman má geta þess að á prófdag sl. laugardag var bókavörðurinn Björn Ingólfsson staddur á bókasafninu á Grenivík, í Grenivíkurskóla þar sem prófið fór fram og heyrði hann í hópnum. Þeir tóku lagið og mikill fyrirgangur var í tölvuverinu.  Að prófi loknu fóru þeir fram á við Björn að hann myndi yrkja vísu um þá sem hann gerði um hæl:

Senn er lokið þessu þófi,
þá mun haft til sönnunar
að þeir sem ná svo þungu prófi
það eru engir hálfvitar!

Hún var ánægjuleg fjölskylduhátíðin í Laufási á mæðradaginn 13. maí síðastliðinn. Þar var þakkað fyrir uppskeru vetrarins í kirkjustarfinu. Um 80 börn og fullorðnir komu saman á helgum reit. Hátíðin hófst í Laufáskirkju. Sr. Bolli og Hjalti Jónsson söng- og spéfugl leiddu stundina. Barnakór Svalbarðsstrandar söng sumar í viðstadda, en það var sannarlega kærkomið þar sem maíhret var byrjað að hrella fólk. Barnakór Svalbarðsstrandar söng 5 lög undir stjórn Sigríðar Huldu Arnardóttur og Sigrúnar Mögnu Þórsteinsdóttur, sem lék á orgelið. Kórinn var landi og þjóð til sóma og viðstaddir hlustuðu ákaflega vel.  Sr. Bolli sagði biblíusöguna um Talenturnar, sem felur þann boðskap m.a. í sér að við eigum að virkja hæfileika okkar. Þá kom brúðan Sólveig upp úr prédikunarstólnum og efaðist um hlutverk býflugna, en Hjalti kom henni í skilning um það að þær hafa hlutverk eins og aðrir. Þá var mikið sungið, kirkjan ómaði öll og ýmsir gleymdu sér t.d. í laginu um þau Daníel og Rut. Eftir stundina var öllum boðið inn í þjónustuhús og þar þáði unga fólkið pylsur, djús og frostpinna á meðan hinir fullorðnu gæddu sér á girnilegu bakkelsi frá Ártúni og stóðu Ártúnshjón Kristín og Benedikt vaktina í kaffisölunni ásamt fjölskyldu sinni. Það er hrein dásemd að fá gott og lipurt veitingafólk í þjónustuhúsið og spennandi að kíkja við í Laufási í sumar og fá sér kræsilegt kaffi. Barnakórinn var í miklu söngstuði og flutti 2 aukalög í þjónustuhúsinu.  Þá var gamli torfbærinn opinn og börnin hoppuðu og skoppuðu í bæjargöngunum, hvort einhverjir hafi fundið búsældarlegar hunangsflugur á gólfum skal ósagt látið.  En hátíðin tókst afar vel og gaman að sjá hve margir komu þrátt fyrir heldur dimma veðráttu.  Guð blessi okkur svo sumarið!!

Í síðustu viku fór sveitarstjórn Grýtubakkahrepps í þyrluflug. Flogið var yfir Gjögraskagann og sest á topp Kaldbaks. Veðrið var bjart og fallegt og útsýnið stórfenglegt. Þótt sumir hafi verið með ferðaskrekk í upphafi ferðar þótti ferðin hafa tekist afar vel og allir ánægðir þegar komið var aftur heim.