Þriðjudaginn 23. febrúar sl. fór fram forkeppni ,,Stóru upplestrarkeppninnar" í Grenivíkurskóla. Í dómnefnd voru þau Inga María Sigurbjörnsdóttir, Sigrún Björnsdóttir og Ingvi Þór Björnsson. Nemendur 7. bekkjar stigu í pontu og fluttu bæði ljóð og sögu. Flutningur nemenda var til fyrirmyndar í alla staði og mega þau svo sannarlega vera stolt af frammistöðu sinni. Þau hafa æft stíft síðan 16. nóvember undir dyggri leiðsögn Hólmfríðar Björnsdóttur íslenskukennara. Allir nemendur og kennarar skólans fylgdust með upplestrinum sem og margir foreldrar. Lesarar fengu viðurkenningu frá skólanum og svo afhenti Ingvi Þór veglega bókagjöf frá Sparisjóði Höfðhverfinga. Sigríður Júlía og Auður Snjólaug voru valdar til að lesa fyrir hönd skólans á lokahátíð „Stóru upplestrarkeppninnar" fyrir SAM-skólana sem haldin var í Möðruvallakirkju þann 2. mars sl. Stelpurnar stóðu sig báðar afburða vel og hafa greinilega lagt mikið á sig á æfingatímabilinu. Átta krakkar fluttu sögu og ljóð og gerðu það mjög vel. Mátti dómnefndin hafa sig alla við að raða í efstu sætin. Leikar fóru svo að Sigríður Júlía varð í 3. sæti en í fyrsta sæti varð Friðrik Karlsson nemandi í Hrafnagilsskóla og Astrid María nemandi í Þelamerkurskóla varð í öðru sæti. (Tekið af www.grenivikurskoli.is)

Auglýsing vegna úthlutunar byggðakvóta á fiskveiðiárinu 2009/2010 sbr. reglugerð um úthlutun byggðakvóta til fiskiskipa nr. 82, 29. janúar 2010

Auk reglugerðarinnar er vísað til sérstakra úthlutunarreglna í neðanskráðum byggðalögum sbr. auglýsingu nr. 187/2010 í Stjórnartíðindum

Fiskistofa auglýsir eftir umsóknum um byggðakvóta til fiskiskipa fyrir eftirtalin byggðarlög:

Árneshreppur (Norðurfjörður)
Sveitarfélagið Skagaströnd
Blönduósbær
Dalvíkurbyggð (Dalvík, Árskógssandur, Hauganes)
Grýtubakkahreppur (Grenivík)
Borgarfjarðarhreppur (Borgarfjörður eystri)
Seyðisfjörður

Umsóknum skal skilað til Fiskistofu á eyðublaði sem er að finna á heimasíðu stofnunarinnar (fiskistofa.is), og þar eru ofangreindur reglur einnig aðgengilegar.  Umsóknarfrestur er til og með 19. mars 2010.

Fiskistofa, 4. mars 2010.

Öll umferð vélsleða og annarra ökutækja er stranglega bönnuð á íþróttavellinum á Grenivík (knattspyrnuvellinum), einnig á æfingasvæðinu og á golfvellinum í Hvammi. 

                                                                       Sveitarstjóri.