Úr skólalífinu

03.02.13, 16:37

Dagur leikskólans.

Dagur leikskólans verður nú haldinn hátíðlegur í sjötta sinn, miðvikudaginn 6. febrúar en þann dag árið 1950 stofnuðu frumkvöðlar leikskólakennara fyrstu samtök sín. Dagur leikskólans er samstarfsverkefni Félags leikskólakennara, mennta- og menningarmálaráðuneytis, Sambands Íslenskra sveitarfélaga og Heimilis og skóla. Tilgangurinn er að auka jákvæða umræðu um leikskólastarf, vekja umræðu um hlutverk leikskóla og kynna starfið út á við.

Í tilefni dagsins ætlum við í Krummafæti að hafa opið hús og viljum bjóða foreldrum og öllum velunnurum að koma í heimsókn til okkar og fylgjast með daglega starfinu okkar sem er bæði fjölbreytt og skemmtilegt. Það er við hæfi á þessum degi að að taka í notkun nýbygginguna okkar "Stórasvæði" sem er stórkostleg viðbót fyrir alla þætti starfsemi okkar.

Velkomin í Krummafót 6. febrúar og að sjálfsögðu verður rjúkandi kaffi og ilmandi kruðerí á boðstólum :)

03.01.13, 11:45

Til hamingju Selma Lind :)

2013

Gleðilegt nýtt ár og takk fyrir það gamla!

Við leggjum af stað í nýtt ár full af bjartsýni og jákvæðni. Og með alveg fullt af snjó! Að vísu finnst okkur flestum snjórinn bara uppspretta skemmtilegheita og getum unað okkur lengi að leik í honum. Bara að það verði ekki þessir umhleypingar með bleytu og vosbúð... það er leiðinlegra.

Benni og piltar vinna hörðum höndum í Stórasvæði og brátt getum við tekið það í notkun... og það verður spennandi.

Afmælisbarn dagsins er hún Selma Lind sem varð 3 ára á nýársdag. Til hamingju elsku vinkona og bjarta framtíð.

21.12.12, 13:43

:)

14.12.12, 13:38

Aðventa

Tíminn líður svo hratt að það verður komið vor áður en við vitum af!

Það er alltaf nóg að gera hjá okkur hér í leikskólanum og gengur lífið bara nokkuð vel. Desember er hálfnaður, styttist til jóla og ekki nema 18 dagar þangað til nýtt ár gengur í garð. Og á nýja árinu tökum við nýbygginguna okkar í notkun... og hlökkum mikið til þess. Benni og félagar vinna hér hörðum höndum á hverjum degi (með tilheyrandi hávaða og rykmekki...) og alltaf færist verkið nær því að verða tilbúið....

Í desember reynum við að hafa dagana eins rólega og við framast getum en það er spenna í loftinu og ákveðin tilhlökkun sem við verðum alveg vör við.

Við minnum á Litlu jólin okkar næsta fimmtudag 20. desember, kl. 14:00.

31.10.12, 13:52

"Nú er hann kominn...."

Síðasti dagur októbermánaðar, 1. nóvember á morgun og 54 dagar til jóla... ef einhver er að telja :)

Og fyrsti alvöru snjódagurinn var í dag. Fyrir krakkana hér var það algjör himnasending, bókstaflega, og þau réðu sér varla fyrir kæti. Já, það er gott að vera ungur og leika sér og finna gleðina í öllu, snjór eða ekki snjór.

Hér má sjá myndir myndir frá því í morgun.

Í nóvember er feðradagurinn.... sunnudaginn 11... og af því tilefni ætlum við að bjóða pöbbunum í morgunkaffi mánudaginn 12. Og ef pabbar komast ekki þá mega afar eða frændur vera staðgenglar :)

Við minnum á SKIPULAGSDAGINN sem er föstudaginn 9. nóvember nk. og þann dag er leikskólinn lokaður.