Úr skólalífinu

06.01.12, 16:20

Afmælisdrottningin Salma

Nýtt ár og afmæli

Gleðilegt nýtt ár allir sem einn og takk fyrir það gamla. Alveg ljómandi þessir fyrstu dagar ársins, ágætis veður og nægur snjór sem er bara dásamalegt fyrir litla krakka hér í leikskólanum. Enda eru þau mjög dugleg að leika sér úti og á meðan ekki er of hvasst þá er útiveran ekkert mál.

Í dag hélt Salma Mariam upp á tveggja ára afmælið sitt, sem er á morgun, á klassískan hátt; popp og söngur. Við óskum henni hjartanlega til hamingju með afmælið og bjartrar framtíðar.

Jóna er nú komin í veikindafrí fram að barneignarleyfi sem hefst hjá henni um miðjan febrúar eða þar um bil, og á mánudaginn kemur starfsmaður í hennar stað sem er enginn annar en Björn Ingi. Hann er okkur að góðu kunnur og mun smella hér inn sem flís við rass... Það verður líka gaman að brjóta upp kynjahlutfallið hjá okkur og a.m.k. drengirnir okkar eru sérstaklega ánægðir. Það eru góðir tímar framundan og 2012 verður örugglega fínasta ár!

Það er föstudagur og helgin að hefjast.... takk fyrir vikuna og góða helgi :)

Úr skólalífinu

27.12.11, 13:18

Gleðilega hátíð

Úr skólalífinu

20.12.11, 16:43

Litlu jólin okkar

Í dag voru litlu jólin okkar hér í leikskólanum haldin með pompi og prakt! Eða þau voru allavega haldin og gengu mjög vel :) Hingað kom séra Bolli og las fyrir okkur jólasögu, við gengum í kring um jólatréð og sungum jólalög og svo birtust tveir skeleggir jólasveinar með poka á bakinu. Þeir voru ansi hávaðasamir og sumir voru hálfhræddir við lætin í þeim en þeir voru nú ósköp góðir og færðu öllum krökkunum gjafir og mandarínur. Kannski sjást þessir jólasveinar á barnaballinu sem verður haldið upp í skóla 30. desember... hver veit?

Í morgun fóru elstu krakkarnir í heimsókn á Grenilund og sungu þar nokkur lög fyrir heimilisfólk. Krakkarnir stóðu sig mjög vel og sungu eins og englar, fólkinu öllu til mikillar ánægju. Góður dagur er að baki og styttist enn meir til jóla. Sumir eru komnir í jólafrí en aðrir halda sínu striki og hvernig sem strikin eru er fyrir mestu að allir séu sáttir.. og það erum við hér í Krummafætinum. Við erum sátt og sæl og gerum alltaf okkar besta í öllu því sem við tökum okkur fyrir hendur, bæði ungir sem aldnir... enda erum við best! hehe, að sjálfsögðu :)

Það eru nýjar myndir á MYNDASÍÐUNNI OKKAR.