Grenivíkurgleðin verður haldin í sjöunda sinn 13. og 14. ágúst nk. Gleðin verður sett  á föstudagskvöld á tjaldstæðinu þar sem hún fer fram. Líkt og undanfarin ár verður mikið um að vera. Lilli klifurmús og Mikki refur kíkja í heimsókn og heilsa upp á börnin, töframaðurinn Einar einstaki verður með töfrabrögð, haldin verður söngkeppni og barnaball, hljómsveitin Hundur í óskilum treður upp með söng og glensi, gamaldags skúrball verður haldið í Útgerðarminjasafninu, Sögufélag Grýtubakkahrepps verður með ljósmyndasýninguna „Horfin hús" í Grenivíkurskóla, tendraður verður varðeldur, lautarsöngur, flugeldasýning og hljómsveitin Big Band Benna Sig. mun halda uppi stuðinu á tjaldstæðinu bæði kvöldin. Kynnir Grenivíkurgleðinnar verður Óðinn Valsson og veislustjórn í verður í höndum Góa og Jóa. Fólk er minnt á að skreyta híbýli sín með appelsínugulu og flagga fána gleðinnar. Dagskrá Grenivíkurgleðinnar er að finna hér á síðunni undir viðburðir.

Í sumar hafa verið farnar kvöldgöngur á miðvikudagskvöldum í sveitarfélaginu í fylgd ýmissa sögumanna. Góð þátttaka hefur verið og göngufólk heppið með veður. Gengið var um Grundarland, í Kvígudali og inn Kljáströnd, um Finnastaðaland, Hólsland, Laufásland, inn Gljúfurárgil og upp á Selshrygg. Í kvöld á að ganga á Laufáshnjúk í fylgd Hafsteins Sigfússonar. Lagt verður af stað kl. 19:00 frá Jónsabúð. Miðvikudagskvöldið 18. ágúst verður gengið um Skarðsland en þar verður Jóhann Skírnisson sögumaður. Lokaganga sumarsins verður síðan laugardaginn 21. ágúst en þá verður gengið frá Grímsnesi út í Látur og komið til baka á sunnudag. Nánar um dagskrá gönguferðanna er að finna hér á síðunni undir viðburðir.

Eining-Iðja gerði á dögunum könnun á launum hjá vinnuskólum í sveitarfélögum í Eyjafirði. Einungis var kauptaxtinn borinn saman hjá 14-16 ára unglingum, ekki tímafjöldinn. Samkvæmt könnuninni greiðir Grýtubakkahreppur hæsta taxtann á svæðinu. Sveitarfélögin ákveða sjálf laun unglinganna því samkvæmt túlkun Launanefndar sveitarfélaga falla vinnuskólar sveitarfélaga ekki undir kjarasamninga stéttarfélaga. Könnunina er að finna á heimasíðu Einingar-Iðju, www.ein.is.