Enn er vorið komið og vonandi fer brátt að hlýna. Vorinu fylgja allskonar vorverk og tiltekt eftir veturinn.
Næstkomandi fimmtudagskvöld verður ruslahreinsun í sveitarfélaginu og hefst hún kl. 20:00 við Jónsabúð. Þeir sem vilja láta fjarlægja stóra hluti geta haft samband við skrifstofu Grýtubakkahrepps.  Miðað er við að ekki sé um meira en einn vagn að ræða. Íbúar í sveitinni geta sett rusl við heimreið sína sem verður svo fjarlægt. Að ruslahreinsun lokinni verður boðið upp á kaffi og meðlæti í Jónsabúð. Eigendur fyrirtækja eru sérstaklega hvattir til að taka til í kringum sín fyrirtæki.
Í næstu viku verða götur Grenivíkur sópaðar með vélsóp. Afar gott væri ef íbúar væru tilbúnir að sópa gangstéttir fyrir framan hús sín fyrir þriðjudagsmorgun. 

                                                       Sveitarstjóri.

Haustið 2005 hófst formleg vinna við Grænfánann í Grenivíkurskóla. Við skólaslit vorið 2007 fékk skólinn fánann afhentan í fyrsta sinn. Nemendur og starfsmenn hafa markvisst unnið að umhverfisvitund síðan verkefnið hófst. Grenivíkurskóli fékk Grænfánann afhentan í annað sinn  við skólasetningu 2009. Áframhald af þeirri vinnu er bæklingurinn Umhverfið og við sem nemendur í 5.-10. bekk í Grenivíkurskóla hafa útbúið og er hugsaður sem framlag nemenda til verkefnisins ,,Varðliðar umhverfisins" í tengslum við Grænfánann. Bæklinginn má sjá á heimasíðu Grenivíkurskóla sem og í tenglasafni hér síðunni.

Kalda vatnið verður tekið af á Grenivík miðvikudaginn, 19. maí kl. 16:00 í u.þ.b. 1 klst. vegna tenginga.
                            
                                             Verkstjóri.