Nú er boltinn farinn að rúlla að nýju og fyrsti heimaleikur Magna í Íslandsmótinu fór fram á Grenivíkurvelli föstudagskvöldið 28. maí sl. er Einherji frá Vopnafirði sótti Magna heim. Leikurinn endaði með sigri heimamanna 2-1. Jafnt var á með liðum í hálfleik 0-0 en strax í upphafi síðari hálfleiks skoraði Víðir Örn með skalla fyrir Magna. Á 63. mín fékk Zsolt Orosz leikmaður Magna að líta rauða spjaldið og léku því Magnamenn einum færri það sem eftir lifði leiks. Á 87. mínútu leiksins skoraði Bjarni Óskar Þorsteinsson fyrir Einherja og jafnaði leikinn. Alveg undir blálok leiksins í uppbótartíma skoraði Lars Óli Jessen sigurmark Magna. Aðgangur var ókeypis á leikinn í boði Sparisjóðs Höfðhverfinga og lögðu margir leið sína á völlinn í mjög góðu veðri. Í fyrstu umferð deildarinnar atti Magni kappi við Dalvík/Reyni á Árskógsvelli en beið lægri hlut 2-0. Næstkomandi föstudagskvöld kl. 20:00 mun Magni leika við Draupni í Boganum á Akureyri.

Dyrnar á Gamla bænum í Laufási voru opnaðar upp á gátt sunnudaginn 30. maí sl. Þennan fyrsta dag sumaropnunar var hlaðið borð af nýbökuðu bakkelsi úr héraði í gamla Presthúsinu. Leiðsögn var um Gamla bæinn þar sem meðal annars var fjallað um viðgerðir þær sem hafa staðið yfir í bænum og framhald á þeim. Í sumar má nú  sjá afrakstur viðgerða við Gamla bæinn sem fram fóru síðasta sumar. Baðstofan sem var hjartað í hverjum sveitabæ er nú tilbúin og því ánægjulegt fyrir gesti að geta gengið þar um á ný. Hús eins og Laufásbærinn þarf á stöðugu viðhaldi að halda og í sumar verður því viðgerðum haldið áfram en að þessu sinni á skála og þökum tveggja húsa. Gestum mun því gefast tækifæri til þess að fylgjast með endurbótunum um leið og þær gerast. Það er einstakt tækifæri til að fræðast um gamalt handverk! Gamli bærinn í Laufási er í umsjón Minjasafnsins á Akureyri en í eigu Þjóðminjasafns Íslands , sem stendur fyrir endurbótum á honum.
Gamli bærinn í Laufási verður opinn í sumar daglega frá kl. 9:00-18:00 til 12. september.

Sveitarstjórnarkosningar fara fram laugardaginn 29. maí nk. Kosið verður í Grenivíkurskóla og hefst kjörfundur kl.11:00. Lokað verður í síðasta lagi kl. 19:00.