Menningarminjadagur Evrópu hér á landi verður haldinn sunnudaginn 5. september nk. Þema dagsins að þessu sinni er sjávar- og strandminjar. Í tilefni dagsins mun Sigurður Bergsteinsson minjavörður Norðurlands eystra leiða gesti um hinn forna verslunarstað Gásir við Eyjafjörð kl. 14:00.
Tilgangur menningarminjadagsins er að vekja athygli almennings á gildi menningararfsins og skapa vettvang til þess að almenningur geti kynnst sögulegu umhverfi sínu. Dagskrá menningarminjadagsins má finna í heild á heimasíðu Fornleifaverndar ríkisins, www.fornleifavernd.is

Grenivíkurskóli verður settur með formlegum hætti miðvikudaginn 25. ágúst klukkan 16:00. Nemendur, foreldrar/forráðamenn og aðrir velunnarar skólans eru hjartanlega velkomnir. Hefðbundin skólasetning fer fram í íþróttasal skólans. Eftir athöfnina fara nemendur í sínar heimastofur og fá frekari upplýsingar um skólastarfið hjá sínum umsjónarkennara.

Grenivíkurgleðin fór vel fram um helgina og mikið var um að vera. Jóhann Ingólfsson oddviti setti Grenivíkurgleðina á föstudagskvöld á tjaldstæðinu í afar mildu og  góðu veðri. Kynning var á grillmat frá Norðlenska og Bautanum og drykkir voru í boði Vífilfells. Hljómsveitin Hundur í óskilum skemmti fólki konunglega á öllum aldri. Haldin var söngkeppni fyrir börn og hljómsveitin Big Band Benna Sig. spilaði fram á nótt á tjaldstæðinu. Sögufélag Grýtubakkahrepps hélt ljósmyndasýninguna „Horfin hús“ í Grenivíkurskóla báða dagana. Á laugardag hélt fjörið áfram þrátt fyrir rigningu, grillað var fyrir börnin í boði Jónsabúðar, hoppukastalar voru opnir, boðið var upp á andlitsmálun, Einar einstaki sýndi töfrabrögð og fleira. Seinni partinn var haldið gamaldags skúrball í Útgerðarminjasafninu þar sem harmonikkutónlistin ómaði og boðið var upp á harðfisk. Eftir að stytti upp um sexleytið fór fólk að tínast á tjaldstæðið á ný og tók til við að grilla. Lilli klifurmús og Mikki refur kíktu í heimsókn og heilsuðu upp á börnin, Gói og Jói tróðu upp, varðeldur var tendraður og Benni, Dóri og fleiri stjórnuðu lautarsöng, flott flugeldasýning og hljómsveitin Big Band Benna Sig. hélt uppi stuðinu á tjaldstæðinu fram á nótt. (Myndir frá Grenivíkurgleðinni eru komnar inn í myndasafn síðunnar.)