Gamli bærinn í Laufási
sími 869-3665
   www.akmus.is
Laufás kemur við sögu skömmu eftir að Ísland byggðist og þar hefur staðið kirkja frá fyrstu kristni. Prestssetur hefur verið í Laufási frá sama tíma og er enn. Síðasti presturinn sem bjó í gamla bænum, séra Þorvaður Þormar, flutti árið 1936 í nýtt prestssetur og þar bjuggu Laufássprestar fram til ársins 2000. Sú kirkja sem nú stendur í Laufási var byggð 1865. Meðal merkra gripa í eigu kirkjunnar er predikunarstóll sem ber ártalið 1698. Við austurgafl kirkjunnar stendur eitt elsta reynitré landsins frá 1855.
Búsetu í Laufási má rekja allt aftur til heiðni en í elsta hluta gamla bæjarins sem nú stendur er talið að séu viðir allt frá 16. og 17. öld. Bærinn var endurbyggður af mikilli reisn í tíð séra Björns Halldórssonar sem sat staðinn árin 1853-1882. Laufásbærinn er stílhreinn burstabær, dæmigerður fyrir íslenska bæjagerð þess tíma, en þó allmiklu stærri. Algengt var að tuttugu til þrjátíu manns væru til heimilis í Laufási, því margt vinnufólk þurfti til að nytja þessa gróðursælu kostajörð en henni fylgdu mikil hlunnindi.
Laufásbærinn er nú búinn húsmunum og áhöldum líkast því sem tíðkaðist í kringum aldamótin 1900. Hann er í eigu Þjóðminjasafns Íslands en í umsjá  Minjasafnsins á Akureyri. Hann er opinn ferðamönnum yfir sumartímann frá 30. maí - 12. september daglega frá kl. 09:00-18:00. Almennt verð í Gamla bæinn er kr. 600 fyrir 16 ára og eldri.
Í þjónustuhúsi er minjagripaverslun og veitingastaður þar sem hægt er að kaupa þjóðlegar veitingar. Mjög góð snyrtiaðstaða er fyrir hendi og gott aðgengi er fyrir fatlaða.
Kirkjan í Laufási er öllum opin en tillit þarf að sýna þegar athafnir eru í kirkjunni. Útsýnið frá Laufási er einstakt yfir Eyjafjörðinn og nærsveitir og því auðvelt að ná góðum myndum. 

Útgerðarminja-
safnið á Grenivík

Útgerðarminjasafnið stendur við Sæland á Grenivík, í Hlíðarenda gömlum beitningaskúr  byggðum 1920 af Stefáni Stefánssyni útgerðarmanni á Miðgörðum.  Á fyrsta ári Hlíðarenda var húsið notað sem skipasmíðastöð. Þar var báturinn Hermann TH34 smíðaður en hann var hálfan fjórða áratug gerður út frá Grenivík og síðar Akureyri og er nú kominn í eigu safnsins. Mest var húsið notað sem beitningaskúr en skúrböllin sem þar voru haldin eru líka sérstæður hluti af menningarsögu Grenivíkur. Síðustu áratugina var Hlíðarendi aðallega nýttur sem geymsla fyrir ýmiss konar útgerðarbúnað.
Viðgerðir á Hlíðarendaskúrnum hófust fyrir nokkrum árum með það að markmiði að varðveita útgerðarsögu Grýtubakkahrepps, sem er býsna merkileg, með því að opna þar útgerðarminjasafn með áherslu á línuútgerð. Það er nú orðið að veruleika.
Safnið er opið daglega frá kl. 13:00-17:00 yfir sumartímann.

Húsdýragarður í Hléskógum - húsdýr og sveitakaffi, sími 863-3112
   www.hleskogar.is
Skemmtilegur húsdýragarður þar sem gestir fá að klappa kettlingum og fara inn til geitanna til að gefa þeim að éta. Í garðinum eru flest íslensku húsdýrin, svo sem kindur, kýr, hestar, hænur, hundur, kettir, geitur og fjórar tegundir af kanínum. Mannelska geitin Stjarna, sem komst í fréttirnar vegna þess að hún hagaði sér eins og hundur, er í Hléskógum og er ennþá jafn vinaleg við gestina. Heimsókn í Hléskóga endar eins og aðrar alvöru sveitaheimsóknir, þ.e. húsfreyjan býður öllum gestum garðsins inn í stofu í kaffi og kökur.
Fyrir þá sem ekki geta fengið nóg af sveitinni, er gott að vita að tjaldstæði er á staðnum og aðgangur að rafmagni og eldunaraðstöðu.
Hléskógar eru staðsettir við austanverðan Eyjafjörð í Grýtubakkahreppi, við þjóðveg 83 í um 20 mínútna akstursfjarlægð frá Akureyri og aðeins 4 mínútna akstursfjarlægð frá Grenivík. 

Golfvöllur í Hvammi Grýtubakkahreppi

Golfvöllur Golfklúbbsins Hvamms er staðsettur rétt við Grenivík, á afar fallegum og veðursælum stað á jörðunum Hvammi og Jarlsstöðum. Völlurinn er 9 brautir (par 34) og auk þess eru 4 æfingabrautir sem henta sérstaklega vel fyrir byrjendur.
Völlurinn var tekinn í notkun sumarið 2004 og er verið að vinna að því að bæta hann, t.d. með endurbótum á teigum og flötum. Nýtt forgjafarmat á vellinum var gefið út í mars 2009. Ekki þarf að bóka teigtíma.
Nánari upplýsingar um golfklúbbinn og golfvöllinn veita Jón Helgi í síma 896-9927 og Þórður í síma 463-3178.

Sundlaug Grýtubakkahrepps
sími 463-3218

Sundlaug Grýtubakkahrepps er staðsett við Grenivíkurskóla, byggð árið 1990. Auk 16 m langrar útilaugar er nýr 8 manna heitur pottur og gufubað. Ný íþróttamiðstöð var byggð við skólann árið 2005 með afgreiðslu, nýjum búningsklefum og líkamsræktarstöð. Sundlaugin er lokuð yfir vetrartímann en afgreiðslutíma íþróttamiðstöðvar er að finna hér vinstra megin á síðunni undir gjaldskrár.

Pólar Hestar Grýtubakkahreppi
sími 463-3179

www.polarhestar.is
Pólar Hestar er hestaleiga sem hefur verið starfandi frá árinu 1985 með langar og stuttar hestaferðir um Höfðahverfi, Fjörður, Látraströnd og austur í Þingeyjarsýslu. Þar eru um 100 hestar á járnum og hestar við allra hæfi.
Boðið er upp á 1 klst. ferðir til heilsdagsferða daglega frá mars til nóvember.
Verðskrá:
1 klst.    3.000.- kr.
2 klst.    4.000.- kr.
Hálfsdagsferð (3 klst.)  6.000.- kr. Kaffi og kökur innifalið eftir reiðtúr.
Dagsferð ( 6 klst.)  9.000.- kr. Samlokur í dagsnesti og kaffi og kökur eftir reiðtúr innifalið.
Pólar Hestar eru á Grýtubakka II við austanverðan Eyjafjörð í Grýtubakkahreppi, við þjóðveg 83 í um 20 mínútna akstursfjarlægð frá Akureyri og aðeins 3 mínútna akstursfjarlægð frá Grenivík.
Panta þarf fyrirfram í ferðir í síma 463-3179
                                                            893-1879 Stefán
                                                            896-1879 Juliane 

Fjörðungar Grenivík sími 463-3236
  www.fjordungar.com
Fjögurra daga gönguferð um Fjörður og Látraströnd með trússhesta.
Lagt er af stað frá Grenivíkurskóla og ekið með hópinn út Leirdalsheiði í gangnamannaskálann að Gili í Hvalvatnsfirði. Þaðan er gengið í Þönglabakka í Þorgeirsfirði sem er gamall kirkjustaður og pressetur. Á degi tvö er gengið í Keflavík sem er gömul jörð við samnefnda vík austan við Gjögurtá. Á þriðja degi er gengið yfir í Látur, höfuðból á Látrastönd og á fjórða og síðasta degi er Látraströndin gengin og inn í Svínárnes. Þar bíður bíll sem flytur ferðalanga til Grenivíkur. Þegar komið er til baka er farið í sund og heitan pott til að ná úr sér þreytu og harðsperrum. Í ferðalok er slegið upp veglegri veislu og ferðalangar slaka á eftir eftirminnilega ferð. Salernisaðstaða með rennandi vatni er á öllum náttstöðum sem og þvottavaskur með köldu (og hressandi) vatni. Hestarnir bera tjöldin og viðlegubúnaðinn en göngufólkið ber aukaföt og nesti dagsins.

Kaldbaksferðir Grenivík
sími 867-3770
www.kaldbaksferdir.com
Kaldbaksferðir eru með snjótroðaraferðir upp á Kaldbak (1,173 m), hæsta tind við norðanverðan Eyjafjörð. Kaldbaksferðir eiga tvo snjótroðara sem útbúnir eru með opnu farþegarými. Annar bíllinn tekur 20 farþega og hinn 32.
Fastar ferðir eru upp á Kaldbak alla daga ef veður leyfir frá janúar til maí.
Lagt er af stað frá aðstöðuplani rétt norðan við þorpið Grenivík og tekur ferðin upp um 45 mínútur. Uppi á toppnum er stoppað í um 15 mínútur og gefst þá góður tími til að njóta útsýnisins sem er hreint ótrúlegt. Bílstjórar eru ólatir við að fræða farþega um það sem fyrir augu ber. Einnig er góður siður að skrifa nafn sitt í gestabókina.
Troðarinn fer sömu leið niður og geta farþegarnir valið annað hvort að fara með honum aftur eða renna sér niður brekkurnar á skíðum, brettum, sleðum eða snjóþotum. Hægt er að fá lánaða snjóþotu ef ævintýraþráin tekur völdin.
Farnar eru 3 ferðir á dag, kl. 10:00, 13:00 og 16:00. Hópar geta samið um annan tíma ef það hentar betur. Lágmarksfjöldi í ferð eru 10 fullorðnir. Nauðsynlegt er að panta fyrirfram í ferðir í síma 867-3770.
Ekið er út með Eyjarfirði að austan eftir þjóðvegi 83 til Grenivíkur. Við skólann er beygt til hægri eftir Lundsbraut og merkingum síðan fylgt að aðstöðuplani Kaldbaksferða.
 

Íþróttafélagið Magni Grenivík
  www.magnigrenivik.is Þorsteinn Þormóðsson formaður sími 893-1887
Íþróttafélagið Magni var stofnað árið 1915 og hefur starfað óslitið síðan. Magni heldur úti meistaraflokki sem spilar í 3. deild í sumar, þjálfari er Hannes Jón Jónsson. Heimavöllur Magna er Grenivíkurvöllur sem er staðsettur í nánd við Grenivíkurskóla, íþróttamiðstöð og sundlaug. Yngri flokka starf Magna er öflugt. Þjálfari barnanna er Hannes Jón Jónsson og Ibra Jagne. Knattspyrnuæfingar eru 4 daga vikunnar,  mánudaga til fimmtudaga,
6.-8. flokkur  kl. 16:15-17:15 
5. flokkur      kl. 17:20-18:20
3.-4. flokkur kl. 17:30-18:30. 

Vetrarparadís í Kaldbak, draumur vélsleðamannsins
Sumarið 2005 stofnuðu KEA og Grýtubakkahreppur samstarfshópinn „Kaldbakur kallar", sem hafði það að markmiði að auðvelda útivistarfólki aðgengi að fjallinu Kaldbaki við austanverðan Eyjafjörð. Margir hafa viljað halda því fram að aflíðandi hlíð Kaldbaks sé lengsta og um margt skemmtilegasta skíðabrekka landsins og það sem meira er að snjór er lengur í hlíðum Kaldbaks en í mörgum öðrum fjöllum við Eyjafjörð. Fyrsta skref í starfsemi „Kaldbakur kallar" var að hvetja til og undirbúa gerð vegar frá Grenivík upp í Grenjárdal í sunnanverðum Kaldbaki.  Hafist var handa og uppbyggingu fyrsta hluta Kaldbaksvegar lauk vorið 2006 en þá var búið að gera um 4000 fm2 plan við enda vegarins í 200 m hæð.   Tæpu einu og hálfu ári síðar eða um mánaðamótin sept/okt 2007 lauk framkvæmdum við Kaldbaksveg en þá var heildarlengd vegarins frá Hólakoti upp á Grenjárdal í um 400 m hæð orðin um 2,5 km með fjórum bílaplönum sem samtals eru um 6500 fermetrar þar sem útivistarfólk getur athafnað sig. Tilkoma Kaldbaksvegar þýðir gjörbreyttar aðstæður fyrir útivistarfólk, það kemst mun lengur fram á vorið í snjóinn. Grýtubakkahreppur, Vegagerð ríkisins, KEA og Vélsleðamenn í Eyjafirði báru kostnaðinn af framkvæmdinni.  Þessi vegur er fyrst og fremst ætlaður fyrir útivistarfólk, s.s. þá sem fara með snjótroðaranum upp á Kaldbak, vélsleðamenn, skíðafólk, göngufólk o.fl.   

Grenivíkurhöfn
Fínasta aðstaða er fyrir smábátaeigendur á Grenivík en nýtt skáplan, uppdráttarplan fyrir smábáta, er í Grenivíkurhöfn.

Fjallaferðir og ökuleiðir út í óbyggðir
Ófáar gönguleiðir eru á fjöll í Grýtubakkahreppi. Eins er hægt að skella sér í  bílferð í óbyggðir en til þess þarf góðan jeppa. Hér fyrir neðan eru  nokkrar stuttar lýsingar á göngu- og ökuferðum sem hægt er að fara frá Grenivík á einum degi eða nokkrum klukkutímum.
 
Ganga á Þengilhöfða
Þengilhöfði er aðeins 260 m á hæð. Upp á hann er auðveld, merkt gönguleið sem röskur göngumaður kemst á 25 mínútum. Best er þó að gefa sér tíma og dóla. Þegar líður á sumarið er hægt að gleyma sér við bláber og krækiber á leiðinni. Uppi á Höfðanum er fallegt útsýni yfir allan fjörðinn og fjallahringinn.
Vegur liggur frá Víkinni upp á Skælu, sem er standberg nyrst á Höfðanum. Þar má við hagstæð skilyrði á sumrin sjá sólina setjast í miðjum firði.

Ganga á Laufáshnjúk
Laufáshnjúkur er 662 m hár. Auðvelt að komast upp á hann en síðasti hlutinn er þó nokkuð brattur. Uppi er konunglegt útsýni yfir fjörðinn enda eru sagnir, og jafnvel nokkur merki, um að konungur fuglanna hafi áður átt hreiður á toppnum. Í arnarhreiðrinu má finna ótrúlega margar plöntutegundir.
Hægt er að fara sömu leið niður eða ganga suður eftir fjallgarðinum alveg suður á Víkurskarð.
Þegar komið er niður er upplagt koma við í veitingastofunni í Laufási og fá sér kaffi eða kakóbolla með rjóma.

Ganga á Kaldbak
Kaldbakur er konungur eyfirskra fjalla, 1173 m hár
Auðvelt að komast upp, röskir menn ná því á tveimur tímum en skynsamlegra er að taka lengri tíma í það. Fjallið er flatt ofan og þar er víðsýni eins og best gerist. Á norðurbrúninni er varða hlaðin af Landmælingum Íslands og í henni er gestabók.
Á vetrum standa Kaldbaksferðir fyrir vinsælum ferðum með snjótroðara upp á topp.

Ganga á Grenivíkurfjall
Fjallið ofan við Grenivík, sunnan við Kaldbak heitir Grenivíkurfjall. Gangan upp er auðveld, yfir móa og mela og þarf ekki endilega að velja einhverja sérstaka leið. Þar uppi í 500 m hæð blasir allur fjörðurinn við augum. Ef menn vilja ekki fara sömu leið til baka er skemmtilegt að ganga suður eftir fjallinu og koma niður hjá Hvammi.

Ganga á Blámannshatt
Blámannshattur - Skessuhryggur
Um nokkrar leiðir er að ræða upp, misjafnlega langar og brattar. Hægt er að fara beint upp með Blámannshnjúknum, eða upp úr Grýtuskálinni eða fara á bíl út að Gljúfurárvaði og ganga inn eftir Leirdal og Þjófadal og koma upp á fjallgarðinn ofan við Grýtuskálina. Fara þaðan eftir egginni suður á Blámannshatt. Þar er gríðarlega fallegt að horfa yfir Eyjafjörðinn. Blámannshatturinn sjálfur er ekki nema 1166 m hár en hryggurinn austan við hann, Skessuhryggurinn, er 1214 m. Þegar kemur þangað upp má í góðu skyggni sjá bæði Herðubreið og Öræfajökul. Hægt er að fara beinustu leið niður en skemmtilegast er að fara suður alla eggina og koma niður hjá Skarði í Dalsmynni.

Ganga á Sveigsfjall
Til að komast út á Sveigsfjall er best að fara upp Grenivíkurfjall og taka stefnuna í norður, upp á Stórafjall og áfram sem leið liggur út eggina út á Sveigsfjall. Hæsti hluti leiðarinnar fer yfir 900 m en Sveigsfjall sjálft á norðurenda fjallgarðsins er nokkru lægra. Sé farið norður af fjallinu er komið niður í Gil. Einnig er hægt að fara austur af því og koma niður á Hávörður. Þangað er hægt að láta sækja sig á bíl eða ganga til baka inn Leirdalsheiði.
Í þessa ferð þarf að ætla sér góðan tíma því þetta er talsverð vegalengd.
Annar möguleiki er sá að fara í bíl út á Hávörður og ganga þaðan á fjallið og sömu leið til baka eða þá inn eftir egginni, öfugt við leiðina sem áður var lýst.

Ganga um Trölladal
Leiðin á Trölladal liggur upp Grenivíkurfjallið sunnan við Grenjá og áfram út Grenjárdal út á Þröskuld sem er allhár hryggur milli Kaldbaks og Stórafjalls. Norðan við Þröskuld tekur Trölladalur við og opnast í norðurendann úti við Gil. Þegar kemur niður í dalinn utan við Þröskuld er ferðalangurinn umlukinn tröllslegum fjöllum á alla vegu, að því séð verður, í grýttu og gróðursnauðu landslagi. Smám saman opnast sýn út í Hvalvatnsfjörð og gróður verður um leið fjölbreyttari. Götur eru greiðar út að Gili.
Hægt er að lengja ferðina með því að fara inn Þverdal, sem gengur vestur úr Trölladalnum, upp á Skörðin og niður í Hóls- og Bakkadal og enda daginn á Þönglabakka.
 
Bílferð í Hvalvatnsfjörð
Góður jeppavegur er frá Grenivíkurvegi sunnan við Gljúfurá út Leirdalsheiði alveg út að sjó utan við Kaðalstaði í Hvalvatnsfirði. Leiðin frá Grenivík er rúmlega 30 km og ekki sérlega fljótfarin eftir að farið er út af þjóðvegi. Ekki er ráðlegt að fara þessa leið á fólksbíl.
Hægt er að fá gistingu í skálanum á Gili gegn gjaldi en landvörður hefur þar aðsetur yfir sumarið. Á Kaðalstöðum er hægt að tjalda og þar er snyrting með vatnssalerni.
Vinsælt er að ganga frá Kaðalstöðum vestur yfir engið, yfir göngubrúna hjá Tindriðastöðum og vestur yfir Hálsana að Þönglabakka. Það er um 5 km. leið. Upplagt er að koma við á Þorgeirshöfða í leiðinni og líta á Nykurtjörnina sem er þar uppi.

Bílferð á Flateyjardal
Frá Grenivík eru um 18 km að Þverá í Dalsmynni þar sem vegurinn liggur frá þjóðveginum um Flateyjardalsheiði út á Flateyjardal. Frá Þverá út að Vík á Flateyjardal eru um 35 km. Vegurinn er fær flestum bílum en ár sem þarf að fara yfir geta orðið ófærar fólksbílum. Miðja vega eru Heiðarhús, vistlegt sæluhús þar sem hægt er að fá gistingu gegn gjaldi.
Á þessari leið er tignarlegt landslag og eyðibyggð með mikla sögu. Nokkur býli voru á heiðinni en mest var byggðin úti við sjó.

Bílferð um Látraströnd
Þokkalega góður jeppavegur liggur út Látrastönd alveg út að Grímsnesi, næstysta bæ á ströndinni. Leiðin er um 15 km frá Grenivík. Látraströndin er brött og hrikaleg en kemur mörgum á óvart fyrir grösugt undirlendi. Þar er að finna afar fjölbreytta flóru. Vegurinn liggur framhjá bæjarrústum í Hringsdal, á Svínárnesi, Miðhúsum og Skeri og endar á hlaðinu á Grímsnesi.
Á sumrin má víða finna gott berjaland á Látraströnd.